Solus quodam in conclaui obscuro euigilaui. Quid enim acciderat? Vbi porro eram? Vbi essem, uix intellexi et uisio quasi oleo aspersa et conclauis speciem uidere haud bene poteram ueritus ne quae alia forsan sub tenebris laterent facultatem me appetendi idoneam opperientia. Lente surgo… at quantus dolor! Me mouere nequibam itaque coactus recubare.

Qua in re cubarem nescii. Mihi uidebatur ueluti lectulus quo aegros iacentes mederetur medicus. an in ualetudinario uersabar? Omnino non memineram. Doloribus summis pressus, paulatim corpus paulo ad laeuum uolui ut conclaue circumspectarem et ubi essem melius comprehenderem. Casu erat fenestrula uelo uiridi fusco paene operta, iuxta quam ostium; omnes res aliae uidebantur medicinales.

Viribus quam maximis lente corpus sustuli, recte paulisper sedebam, spiritum magnum duxi, me erexi, accessi ore torquente sensim et pedetemptim ad fenestram. Cum aduenissem, uelum tandem, uiribus omnibus sumptis, sustuli, et obtutum defixi in rebus extra fenestram uersantibus: nauis sideralis mea trahebatur radiis lucis post nauem qua nunc uectus sum, quae nauis multo ingentior mea.

Vires improuiso e corpore effluentes sensi et, paene exanimatus, limis oculis animaduerti in mensa mihi proxima esse medicamentum quo dolorem prohiberem. Quod cum edissem, connixus sum ut ad lectulum redirem, deinde ut cubui obdormii.

Cum euigilarem, caput sustuli ac circumspectaui. Eadem tranquillitas et opacitas ut ante conclaue implebant. Medicamentum iterum edi et spirito ducto magno exsurrexi. Diis gratias ago quod iam non tantum mihi dolebat corpus quantum antea. Ad fenestram redii, e qua prospexi: nauis sideralis mea post illam qua uehebar. Ad ianuam me contuli et nonnihil reclausa foris oculos in quid ante me situm clam coniciebam. Nihil praeter aerem paulum foedum familiarem et languidas luces subcaeruleas nauium sideralium popularium. In limine commoratus paululum dein e conclaui egressus sum ac per nauem pererraui.

Paucis post horis tota explorata naue, dubitaui quin nemo praeter me hic adesset. Nullis cellulis fugae elapsis, omnia manserunt ueluti nautae necopinato euanuissent. Ad culinam ire constitui ad coffeam bibendam. At me cum uerti, in praua ad parietem scripta uerba oculos fixi: “Tigna e chalybe facta liquefacere non possunt alimenta aeroplani.”